ಚೌಪದಿಗಳು

2008  --  7 . ಬನ್ನೇರುಘಟ್ಟ Time pass  !!  

ಹಿತ್ತಲಲಿ ನಾ ಕುಳಿತು ಎಣಿಸಿದ್ದೆ ಸೀಬೆಫಲ, 

ಹತ್ತು ದಿನಗಳ ಬಳಿಕ ಕೀಳಬಹುದೆಂದು.

ಅಳಿಲು ಬರದಿರಲೆಂದು ಚೀಲಗಳ ನಾ ಕಟ್ಟೆ, 

ಟೊಂಗೆ ಮುರಿದಾ ಮಂಗಕುಪಹಾರವಾಯ್ತಿಂದು !! 

2013  --  8.  ಶ್ವಾನ - ಶಾಪ 

ಎಲ್ಲರೊಲುಮೆಯ ಅತಿಥಿ ಬಂದಿತ್ತು ಶ್ವಾನ 

ಪುಟಿಪುಟಿದು ಓಡುತ್ತ ಬಾಲವನ್ನಾಡಿಸುತ 

ದೊಡ್ಡದಾಗುತ್ತಲೇ ಸಿಕ್ಕದ್ದು ಕಚ್ಚಿರಲು 

ಶ್ವಾನವಿತ್ತವಗೆ ನಾ ಹಾಕಿದೆನು ಶಾಪ ! 

ಚೌಪದಿಗಳು.....

2009 --  4 . ಬಟೂರೆ

ಪಕ್ಕದಾ ತಾಟಿನಲಿ ಪೂರಿ ಗಾತ್ರವ ಕಂಡು , 

ತರಲು ಹೇಳಿದೆ  ನಾ , ಒಂದು ಪ್ಲೇಟ್ ಪೂರಿ . 

ಹತ್ತು ನಿಮಿಷವ ಕಳೆದು , ಅಂಗೈ ಗಾತ್ರದಿ ಬರಲು 

ಎಣಿಸಿದ್ದೆ ತಪ್ಪಾಯ್ತು,  ಪಕ್ಕದ್ದು ಬಟೂರೆ    !! 

2008 --  5 . ಚೆನ್ನ ......... 

ಹೊಸತು ಹೊಸತೀ ಮನೆಯು ಮನೆಯ ಒಡೆಯಗೆ ಚೆನ್ನ 

ಮನೆಯನಾಳುವ ಪರಿಯು ಅವನ ಮಡದಿಗೆ ಚೆನ್ನ 

ಆರಾರಿಗಾವಾಗ ಏನೇನು ಚೆನ್ನವೋ ?

ದೈವ ಪೊರೆಯಲಿ ನಿಮ್ಮ ನಮಗದುವೆ ಚೆನ್ನ ! 

2010. --  6. ಮಥುರಾಸೇವೆ 

ತೀರ್ಥಯಾತ್ರೆಯ ಸಮಯ ಬಸವಳಿದು ನಾನಂದು 

ಕೃಷ್ಣನಾಲಯದೆದುರು ಮರದ ಬಳಿ ಕುಳಿತಿರಲು 

ಭಕ್ತಾದಿಗಳ ಗುಂಪು ಮೆಟ್ಟು ಬಿಚ್ಚಿದರಲ್ಲೇ 

ಕಾಯುತಿದ್ದುದೆ ಸೇವೆ , ಹೀಗಿತ್ತು ಸ್ಥಳಮಹಿಮೆ ... !! 

2006 - 3. ಹರಕೆ

 ಸ್ವಾತಿಯಾ ಮಳೆಹನಿಯು ನಿನ್ನ ಪಡೆದಪ್ಪ, 

ಕಡಲಿನಾಳದ ಚಿಪ್ಪು ನಿನ್ನ ಹಡೆದವ್ವ ,

ನೀನು ನಂಬಿದ ದೈವ , ನಿನಗೆ ಮುದ ತರಲಿ 

ನಾವು ಕೋರುವ ಹರಕೆ ನಿನಗೆ ಶುಭ ತರಲಿ !